La Usc di Ladins

»Aon cognù star cec doi egn… ma ades che aon podù se molar, aede vedù che che sion stac bogn de endrezar?« L é legreza anter i componenc de la sociazion Bela Ladinia, che en vender prum de oril (e no l é pa n sgherz!) i à metù a jir la edizion numer 25 del Trofeo Tita e Marco, per recordar doi amisc che no é più co noi ma che ampò te ne nesc recorc i é semper vives.

Chel dì, l temp à fat dalbon l mat de oril: da le cater domesdì l nevea de pien, tant da far pissar se la fossa jita o manco a far la garejada, ma da le sie l aea lascià e duc à podù se enviar via: 119 picole lume se à enarloà su per l portoi che va sun Ciampedie, chi mingol più bonora, i autres da le ot da sera canche se à sentù l colp del via.

De chisc pascioné de schi da mont n era de dute le sort: 28 cobie anter amisc, fra e sor, pare e fia, pare e fi, om e femena… e dapò l era chi che se à fat la raida zenza la rilavazion del temp, 63 gaerc più e manco joegn. Dalbon na bela sera de legreza e sport.

Do la garejada a la Baita Checco duc i atlec à podù ciapar na pasta super bona e n douc (e sessaben zeche per se parar la seit…) e l é stat endrezà na gran bela loteria olache i più fortuné se à portà a ciasa enscinamai n pé de schi. Speron che da ades inant la vae autertant ben e che se posse amò se goder, far festa e sport duc ensema!

N gran devalpai va ence da man de le familie de Marco e Tita a duc chi che à endrezà e didà e che no i se desmentia mai de chisc doi amisc tant benvolui, prum de dut a la sociazion Bela Ladinia, che ence da soa part la vel rengraziar duc i volontadives, l Socors, la Crousc Checena, le femene dal the, la Sozietà Catinaccio, la Baita Checco e duc chi che à didà e tout part. SM/LG

Podede lejer la classifiches su La Usc stampèda de vemder ai 15 de oril.  (SM/LG)