La Usc di Ladins

La »Delicious Trail Dolomiti« é na gara da salté sö por munt che ti dá la poscibilité ai partezipanc da se archité pro deplü üties a mangé y ciarcé de vigni sort de spëisa, tradizionala y gourmet. Iniann él gnü porté ite na novité: dlungia le percurs plü lunch, de 43 km cun 3.100m de deslivel, che pëia ia dal zënter da Cortina y le percurs plü cört de 23 km cun 1.300 m de deslivel, che pëia ia da Pocol, él gnü desfiré ince n percurs mesan cun start ai pisc dla Gran Risa a La Ila. 1.130 é i partezipanc che é piá ia la sabeda da doman, da Ampëz y da La Ila, por salté sö por munt. Chi che á fat le percurs plü lunch é rová cina a Croda da Lago, les 5 Tors, le Nuvolau, itissö por les galaries de Lagació, cina sönsom a 2.700 m de altëza. Tres i percursc êl 15 üties che pitâ da mangé y pro la ütia de Bioch él sté le cogo da stëres, Norbert Niederkofler, che á presenté so tai: n ramen da munt, cun noodles, bröt scür de carfiol, daikon mariné cun öre de porcins, erbes da munt y sossa de soia.

Pivk y Turini davagna
Le percurs plü lunch, le »Deliciours Trail Dolomit«, é gnü davagné dal atlet dl Friul Tadei Pivk cun le tëmp de 4:24:46 y da Giuditta Turini da Gressoney, tla Val d'Aosta, cun le tëmp de 5:29:52. Tramidui é atlec de skyrunning: Pivk á davagné döes copes mondiales de skyrunning y Turini é campionëssa mondiala te chësta disciplina.
Sön le percurs mesan, la novité de chësta ediziun, á davagné Marco Tramet cun le tëmp de 3:37:42, y pro les ëres da Pina Deiana, 4:10:37. Sön le percurs plü cört se á alzé fora Alex Rigo, 1:58:33, y Ludovica Rossi, 2:37:36.  (kp)