La Usc di Ladins

30 egn de Sellaronda Skimarathon. N cedean toron che vegnarà festejà chest an belapontin a Cianacei.

La 30^ edizion de la garejèda a cobies de net coi schi de alpinism sarà en vender ai 22 de mèrz e i atlec pontarà via da les 6 da sera da Fascia per corir dut l percors de 42 chilometres con 2700 metres de dislivel che va etornvia l Sela. 
A Cianacei, chela che vegn conscidrèda mingol la cuna di ‘sellarondisć’, la garejèda rua deretorn do 6 egn, l’ultima partenza da Fascia era stata defat ai 16 de mèrz del 2018. Chela edizion era stata venta da la cobia da la Svizra Martin Anthamatten e Werner Marti e anter eles da la cobia internazionèla con Alba De Silvestro e la svizra Jennifer Fichter. 
En mercol ai 13 de mèrz l event é stat prejentà dal Comitat Organisador de Sellaronda col Comitat Gregn Evenc de Fascia e Dynafit lo dal refuge Salei sun Sela.
Al moment ofizièl de prejentazion l é entervegnù l president del Comitat organosador Osvald Santin,la secretèra generèla Daniela Perathoner, l ombilt de Cianacei Giovanni Bernard, l president de la giuria internazionèla Omar Oprandi, l diretor del Comitat Gregn evenc de Fascia Cristoforo Debertol e l raprejentant del marketing aportif Dynafit Daniel Luziani.
Te chela bela cornisc l é stat recordà con n gran batiman Diego Perathoner, ideator de la manifestazion. Santin, che à tout su sia redenes l à recordò che da 300 cobies se é rué dant dal Covid a 650, e ades se se à stabilisà a 550 cobies.
L event sarà da poder l veder enceen direta streaming da les 19:15 sul sit ofizial  www.sellaronda.it.