La Usc di Ladins

L Fascia se tol fora da la Alps Hockey League. Tinultima la é ruèda, la neva che jà da vèlch temp valgugn se spetèa. Tras n comunicat vegnù fora sul sit ufizièl, i Falcons à comunicà a inom del Consei de aministrazion che no i farà più pèrt de la lega che tol ite club taliegn, austriaches e slovens.

Chesta cernia à fat trop rumor te val, olache l sport con feres e steches l resta semper anter i prinzipèi, ma la troa desvaliva motivazions. La pruma e prinzipèla l é l mudament de intenzions che à caratrisà l tornoi transnazionèl, nasciù tel 2016 con l obietif de fèr crescer i atlec de cèsa e sostegnir l moviment hockeystich vardan soraldut ai joegn. Emben oramai la Alps no vèrda più a chest ma la é doventèda se volon dir semper più profescionistica: se peisse per ejempie a la dezijion de no aer più i vincoi de roster che vegnia dac dal coscita dit »roster a ponts«. Ma la motivazions é de segur ence economiches, per n sport che te la Tèlia no se pel defenir rich e che l à vedù n gran smaorament di cosć da no poder più fèr fora per na sozietà picola desche chela fascèna.

Dut chest à portà ence a resultac no ezelenc su la giacia, che ge à fat perder mingol de enteres ai sponsor e ence a la jent, semper manco prejenta al stadie endèna la partides. N pecià per n sport che à gran tradizion te Fascia e per n club che à tegnù semper aut l inom de la val con gran pascion e voa de fèr. Sun chesta costion aon volù scutèr ence la paroles del president del Fascia, Roberto Ongari, che l ne à contà vèlch de più. Seguramenter fèr n pas endò no l é n faliment, ma na neva ocajion che porta neva possibilitèdes e prospetives da poder desfrutèr per l ben de la sozietà, de duc i atlec tesseré e di pascioné che ama chest sport.

Podede lejer duta l'intervista al president Roberto Ongari su La Usc stampèda de en vender ai 22 de mèrz.  (Daniele Verra)