La Usc di Ladins

Chest an l calandèr ladin l’é mìngol desvalif respet ai etres egn, no tant per la fotografìes o per l soget chierì fora, ma per l lengaz: da più mans l’é ruà critiches percheche l’é senester da entener che che l’é scrit, che l somea scrit enscinamai te n lengaz forest!

Embendapò gé dighe che chi che à moet chesta critiches l’à rejon! Perfinamai nos che l’aon scrit aon abù debesen de vardèr fora i dizionères per durèr delvers chesta paroles!

Ma gé me domane, co él possìbol che stenton scì tant a entener paroles che vegnìa durèdes e capides amò di egn ’70 del sécol passà? Sione metui scì mèl?

Ben segur che tel calandèr assane podù durèr paroles più sorides, entenudes da duc e che fosc fossa ruèdes dretes al cher di fascegn: segur che se inveze che durèr ad ejempie crepores assane dit gran freit fossa stat più lijier, ma gé peisse che fossa ence stat n gran pecià perder endò n’autra ocasion de tor cà paroles che é dò a morir fora o che é jà mortes fora.

Chesta paroles les starà fora tachèdes sui parees de la cèses de Fascia per dut l’an che vegn e donca no fossél bel se zachèi, a forza de les veder dì per dì, l n’imparassa àmancol una e l la durassa amò?


Cognassane mìngol duc proèr a se durèr la fadìa de rejonèr fascian miec che podon, perché se no ge averjon no demò l’usc de portech, ma ence duta la fonestres a n burt fascian talianisà o, amò piec, a un amò più burt talian fascianisà!!

Con l’an nef tropes se met dant i propòjic e la bela intenzions da fèr via per l 2020: se mever fora mìngol de più, passèr più temp insema a sia jent, emparèr zeche da nef e c.i... anter chisc podassane troèr mìngol de lèrga ence per rencurèr nosc bel fascian.

Bon An 2020 a duc


 (Nives)