La Usc di Ladins

La Musega de Moena à portà dant enstadì n conzert rich de emozion. L’era amò temp de feste, en vender ai 3 de jené, n moment adatà per se lasciar ciapiar ite dai sentimenc. E te più che na sonada la Musega é stata bona de tociar le corde più sotile.

“Emozions d’invern” l’é stat l titol cernù per chest nef conzert che à binà a una i toc musicai emparé via per dut l’uton. I museganc, sot la direzion de la maestra Annarosa Pederiva, à avert soa ejibizion junsom sala del teater de Navalge portan dant “stille Nacht, heilige Nacht”. N moment aprijià che à menà i scutadores amò tel spirit del Nadal.

Dapò i se à tramudà sun paladina e i à tacà ite sie conzert. I à portà dant na dejina de sonade, dute una dò l’autra, passan dal stil più bandistich con Kaiserin Sissi, Zeitlos e Heublumen Polka a sonade più moderne e da orchestra desche Moment for Morricone, Pachelbel’s Canon “Canone in D”, Musik für Michaela o amò na sonada da Nadal desche Mary’s Boy Child. Ite per anter i à portà dant ence doi toc particolares, un sonà demò dai strumenc a ancia sul stil baroch e un portà dant demò dai otons, doi sonade che à fat sentir la capazità e la braura di museganc.

A mez del conzert l’é stat envià sun paladina l’assessora a la cultura del Comun de Moena Ilaria Petrone che ge à fat i complimenc a duta la Musega. “Me sà che siede doventé amò più bravi via per chest an” – l’à dit. E dapò la ge à fat i augures de bon lurier al nef diretif de la Banda lità chest uton e soraldut al nef president Luca Senettin che à tout l post de Dino Perut.

L president Senettin se à cruzià ence de la prejentazion de duc i toc musicai. L’à tout l’ocajion per enviar la jent a ge star dò a la Musega e l’à uzà fora n apel ai joegn. “Ajache aldidancö sion doventé duc social speron che i jovegn ge varde a noscia piata Facebook i mete n like, ma endana che i ge varda speron ence che ge vegne estro de sonar, i mole l fonin e i vegne te la Banda.” N envit che se spera che semper più joegn tole sù con gaissa e piajer.

A la fin del conzert la jent te sala à amò domanà doi bis e coscita l’é stat serà sù n conzert che à moscià che la Musega de Moena à segur n gran potenzial ajache la é stata bona de emozionar dut l publich con sentiment e braùra.        (Monica Cigolla)