La Usc di Ladins

A 3 meisc da la litazions aministratives, ge fèr cognoscer a la comunanza, donca ence ai candidac potenziai, coche vegn endrezà l lurier te na aministrazion, l’era segur na bona idea. 

A tor sù l’envit del grop de zitadinanza ativa »N cör per Moena«l’é stat ampò demò na ventina de persones, presciapech metà femenes, che en mercol ai 29 de jené te Comun de Moena les à podù scutèr i intervenc de Luigi Chiocchetti, Mario Andretta e Luca Zanon, prejenté da Annalisa Zorzi.

Chiocchetti, secretèr del Comun de Sèn Jan, à fat na panoramica su l’organisazion e l’aministrazion de n Comun e coche la é mudèda tel temp. L’à rejonà de la lege per la litazion direta de l’ombolt, che arsegura maor governabilità ma la penalisea la mendranzes, e del raport anter pèrt politica e funzionaries, che i à da esser super partes e arsegurèr che la dezijions di aministradores vegne concretisèdes, ma semper tel respet de la normes e prozedures pervedudes, ajache l funzionarie cogn se tor la responsabilità di provedimenc che l sotescrif. L’à rejonà ence del prozess de fujion di Comuns, de chel che l’à abù esperienza direta, dijan che per sie cont l’é na bona roba, enceben che al scomenz no sie sorì armonisèr n endrez e sistemes de lurier desferenc.

De più su La Usc stampèda de vender ai 7 de firé 2020.  (Lucia Gross)