La Usc di Ladins

Va inant la discuscion su la strada de Pra de Sort. Dò la touta de posizion de Italia Nostra, de chela che aane dat cont su La Usc di 24 de messèl passà, à manà ite sia posizion n grop de sentadins de Sort che amò de oril del 2019 ge aea portà dant a l’Aministrazion de Comun de Moena na proponeta de soluzion del problem de traversament del Pra de Sort per portèr jù l legnam sutà via per jabas a cauja del tormen Vaia.
»Da semper aprijion l’atività de Italia Nostra per i prinzipies a chi che la se poja e per le sacotante batalie che la porta inavant per la defendura de l’ambient – scrif l grop de sentadins de Sort. Chesta oita aboncont la touta de posizion de la Sociazion sul problem de la strada de Pra de Sort ne somea falada e no fata con i aprofondimenc e le informazion che passenea.
En realtà la sociazion ambientalista tol sù le rejon metude dant più oite da n grop de sentadign de Sort che é de contra al projet metù jù da l’Aministrazion de Comun, en cordanza con i Servijes provinziai competenc, per aer deliberà la projetazion e realisazion de na strada che traversa en part Pra de Sort che rua fin aló dal piazal del ciamp da balon olache vegn metù a tasson l legnam. La cusa l’é chela de aer fat na scelta falada per l percors che »taa fora« i prè e che l’é dalbon da impat.

De più su La Usc 31 de vender ai 7 de aost  (Monica Cigolla)