La Usc di Ladins

Angern te l’ospedèl de Kampala à fenì sia vita sun chesta tera l miscionarie da Moena fra Elio Croce. Nasciù del 1946, de 25 egn l’era jà te l’Uganda. Tirà fin da picol da la vocazion miscionaria, l’aea dat i voti da laich coi comboniegn per meter sia competenzes tecniches al servije de la comunanzes più desfortunèdes e dalonc, olache ampò no l’à portà demò sia gran capazità operativa, ma soraldut sie gran cher e n ejempie de fe e ciarità che à lascià l segn te l’Africa e te noscia valèdes.

Brother Elio l’era stat enfetà dal coronavirus entorn la metà de otober ma al scomenz no someèa che la situazion sie tant grieva, dapò enveze l’é piorà e da Gulu, olache l stajea, l’era stat portà a l’ospedèl de Kampaka e parea che l tache a miorèr, ma ai 11 de november da sera l’à abù na crisa e l virus à abù la venta.

L’aea scombatù la batalies contra i ditatores, la vera zivila e i rebestesc che à dessatà l’Uganda, contra l’Aids e la meseria, contra i pregiudizies per i pìcioi pedimenté e ence contra la gran epidemìa che del 2000 l’aea enfetà e fat morir n muie de jent e che el enstes à documentà tel liber “Più forte di ebola”.

Dal 1985 l’era stat chiamà a portèr sie prezious servije al St. Mary’s Hospital de Lacor, vejin a Gulu, e del 1986 l’aea didà a meter en pe l St Jude Children’s Home, la cèsa per i bec pedimenté, orfegn o arbandoné, con la scola per duc i pìcioi. Daperdut con sie gran cher l’à lascià l segn positif fon no demò te la vita de la jent de l’Uganda, ma ence te chela de n muie de joegn de noscia valèdes che te chisc egn i é jic ló a fèr volontariat e che i à seghità a ge stèr dò e sostegnir si projec travers la sociazion »VolontariAmo St.Jude«.

Con el te l’Uganda l’era stat ence Cristina Lorenzoni da Sèn Jan, che dapò la é doventèda monia. “Brother Elio ne à dat l’ejempie de che che vel dir esser miscionaries – recorda Suor Cristina - dar la vita e ge dar n segnificat a noscia vita con l’atenzion ai ultimes. Me recorde che na dì jiane co l’auto e rejonaane (una de le robe straordenare per me l’era ence esser te l’Africa e parlar con el per ladin) canche l’à vedù n picol bez vejin a la strada e sobito l se à fermà a jir a veder se chest bez l’aea zachei o se l’era arbondonà o en dificoltà. Na picola azion fata zenza nience ge pissar, che me à fat capir che l’é semper l temp e l moment per se cruziar di autres.”

Ades sie gran cher se à fermà, ma sia testimonianza va inant te chisc joegn. En sabeda da mesa les 6 da sera Brother Elio vegnarà recordà te na messa a Trent te la Gejia de la Sènta Trinita, e dapò segur ence i amisc de »VolontariAmo St. Jude« e nesc gropes miscionaries de val i farà chel che se pel per l recordèr. “Entant l recordon te le orazion e rengrazion l Segnoredie de ne l’aer dat – disc Suor Cristina - I picoi del St Jude a so funeral i farà festa, perché ic i creit e i cognosc la bontà del Segnoredie e l’opera de Brother Elio e i sà che l’é jà sun Paradis.”

 (Lucia Gross)