La Usc di Ladins

Veder i studenc che stèsc al freit, te na dì da neif desche anché, fora da sia scola ma con computers e fonins coleé a la lezion da dalonc, fèsc dalbon pecià.

L’é chesta la azion che la maor pèrt di bec de la clasc 5^ LLB à metù a jir en lunesc ai 8 de firé inant les 8 da doman: na azion deldut chieta, zenza ac ne striscions, spetan che i studenc en prejenza vae ite e respetan ogne protocol, ma tant determinèda da azetèr de stèr dut inant mesdì de fora al freit per palesèr sie dejèje per desvaliva costions: la modalità de didatica da dalonc al 50%, che no engaissa a studièr, soraldut vedù che ti dis de prejenza vegn fat soraldut interogazions e verifiches, l pensier de cogner viver a chesta maniera sie ultim an de scola auta e la malsegureza en cont di ejames. 

“Sion a l’ultim an – i à dit - no saon amò nia de coche sarà nesc ejames e no volassane vegnir a saer la robes doi setemènes dant dai ejames. Per nosc cont la situazion di contages tel Trentin ades no la è tant pesoca da no poder jir a scola en prejenza, amancol per i studenc de 5^, che i cogn se enjignèr per i ejames e i volessa poder viver al miec sie ultim an de scola ensema. Aon vedù na gran profescionalità te la gestion de Trentino Trasporti e pisson che no fossa problemes se endrezèr a na vida desferenta. L’aisciuda passèda dut l’é ruà de colp – à dit amò i studenc – ma chest istà fossa stat dut l temp per se endrezèr a na vida desferenta.”

I bec à abù la solidarietà de desvalives ensegnanc, che i à dit che l’é giust che i studenc fae sentir sia ousc e i se mobilitee per defener e portèr inant sia idees. La referenta del Liceo artistich Barbara Fanton, ajache chesta clas del linguistich é loghèda te la neva senta de l’artistich e l referent di Licees linguistich e scientifich Domenico Bravi i ge à dit che i aessa volù poder i lascèr ite te scola, ma i decrec no ge l permet. 

I referenc à chiamà l Sorastant Claudio Valentini, che l ge à dit ai studenc: “Gé ve capesce, fosse l prum a esser content se podassède vegnir duc, ogne dì, fossa n muie de problemes de manco ence per nos, ampò cognon fèr i conts con l Covid e con chesta situazion dassen senestra e gé desche sorastant cogne aplichèr la normes.” Valentini à sotrissà che la scola à la mans leèdes ajache la desposizions vegn da la Provinzia e amò più en aut dal Minister, donca la soula roba che l pel fèr l’é informèr l departiment a Trent de la posizion de chisc studenc e dapò la segnalazion podarà vegnir manèda più inant a l’assessor e ence a Roma, olache ampò ades no l’é nience n minìster. Valentini à sotrissà purampò che no l sostegn chesta azion di studenc, che i aessa podù ge pissèr sora miec e se proprio jir te ofize del Sorastant a ge palesèr sie dejèje, enveze che envièr via na azion de protesta, che no l peissa che la posse aer gran ejit.

I studenc à rebadì che sia azion no la é de segur “contra” la scola, ma che ampò i volea che sia posizion vegne cognosciuda. Da les 8.30 i se à donca coleà con si despositives per la pruma ora de lezion da dalonc, de fora. Nos speron che chesta azion posse aer vèlch efet positif e... che chisc bec no se giave massa!  (Lucia Gross)