La Usc di Ladins

Da vèlch an en ca l’é stat metù en esser te Fascia l »Portel per la dependenzes e no demò«, nasciù da la colaborazion anter l Comun General de Fascia e la Coprativa Sozièla Le Rais. L’é n portel per scutèr sù la jent out a la persones, a la families e a duc chi che à de besegn de n didament e de n sostegn. No l’é da paèr nia per se emprevaler del portel e se pel tor n apuntament al numer 370 3004296 opuramenter col manèr na mail a la direzion sportello.lerais@gmail.com
Chesta scomenzadiva la é nasciuda anter cheles de n projet out soraldut a l’argoment de la dependenzes, ma l tol dant persones che les é te n moment senester ence per via de autra rejons.
Se volassane dir en curt che che l’é na dependenza podassane osservèr che la é caraterisèda da chisc doi aspec: no poder fèr condemanco de na sostanza o no poder renunzièr a n comportament e l fat che la sostanza o l comportament dovente de gran emportanza te la vita de la persona.
Se pel rejonèr de sostanzes e comportamenc canche la persones les doventa dependentes de na sostanza (alcol, droghes, tabach e c.i.) o de n comportament (jech, internet, videogames e c.i.).

Per chel che vèrda la dependenzes i studies scientifics i desmostra che duta la ativitèdes de prevenzion les é fondamentèles, anter i più joegn ma no demò, co l’obietif de meter en consaputa e de sensibilisèr duta la popolazion. L’é ence n muie emportant fèr prevenzion rejonan de sostanzes e dependenzes, ma ence tolan ite a na vida più slarièda fora l’argoment de la sanità, defenida da l’OMS no desche biota mencianza de la malatìa ma desche benesser sozio-psico-fisich.
L’esperienza del portel portèda inant ti ultimes egn la ge à fat entener tras de più ai operadores che l’argoment de la dependenzes l’é zentrèl te noscia realtà teritorièla. Per chesta rejon l’é stat pissà de enrescir fora se chesta imprescions les à n fondament e se à rejonà se fossa stat de utol tor ite i sentadins de Fascia per chierir de entener miec coluns che l’é i besegnes de la persones che stèsc te nosc raion.
Aldò de chesta conscidrazions l Comun General de Fascia e la Coprativa Le Raìs i à cherdù de utol enjignèr n chestionèr, sorì da empienir ite e deldut anonim, da slarièr fora anter la jent che stèsc te Fascia, co l’obietif de aer n chèder de la situazion te noscia val più che l’é meso agiornà e spezifich.
Se pel desciarièr l chestionèr a chest link: https://forms.gle/jbZdmjCBT1xyDh278 

De più sun La Usc 06 di 12 de firé