La Usc di Ladins

En domenia ai 11 de oril se à avert la Veneto Cup 2021, con l trofeo GT Trevisan desche pruma tapa. La garejèda de roda da mont se à coret a Montecchio Maggiore con l cross country »dei Castelli«, proa endrezèda dal ASD Jonny Bike en colaborazion con l comun venet. Per via del Covid l percors de zirca 11 chilometres l’é stat mudà respet a chel tradizionèl, a na vida che i ziclisć se scontre l manco possibol dò strèda.

Sot la pievia forta che no à dat rechia nience per un menut, ence i doi atlec fascegn de l’US Litegosa Mattias Rosso e Luca Vuerich i é rué al travert con de bogn resultac. I doi joegn ryders à garejà te la senestra classifica Open, olache cor ence i Elite. A venjer la proa l’é stat defat l’atlet del Tirol KTM Cycling Team Kevin Pezzo Rosola, che l’à completà la 2 rondes pervedudes te 1h08’43”. Al secondo post Domenico Valerio tardif de 10” e al terzo Nicholas Pettinà con 13” de destach.

Per chel che vèrda la bela proes fascènes, Mattias Rosso à serà la 2 rondes te 1h13’32”, se vadagnan coscita la 16^ piaza assoluta, Luca Vuerich te 1h19’41” l se à enveze logà al 31° post.

Anter la femenes venta de Debora Piana te 1h29’19”. Seconda Chiara Burato (+1’59”), terza Asia Zontone (+4’42”). Anter i Junior ventes per Vittoria Pietrovito e Lorenzo Baitella.

 (Daniele Verra)