Anché, vender ai 30 de oril da les 12.30, la prejentazion di projec, frut de la colaborazion anter l'Università e la istituzions de Fiem e Fascia. La scontrèda vegn manèda fora en direta su Radio Fiemme e en streaming sun sia piata Facebook.
Formazion a distanza e tecnologia aplichèda al sport e inovazion, con n eie a la Olimpiades del 2026. L’é chisc i obietives de n projet de calità, nasciù da l’idea de la jent de la valèdes, col sostegn del teritorie, che vegn prejentà anché, vender ai 30 de oril, tel Palaz de la Magnifica Comunità de Fiem a Ciavaleis. N projet che tol ite la Provinzia e l’Università de Trent con sie nef retor Flavio Deflorian, nasciù belapontin da n grop de joegn che fèsc pèrt del volontariat e de la sociazions e che é stat tout sù con enteres da la istituzions.
A la scontrèda de prejentazion tol pèrt Renzo Daprà Scarie de la Magnifica Comunità de Fiem; Andrea Dezulian promotor del projet; Flavio Deflorian retor de l’Università
de Trent; Flavio Bazzana diretor del Departiment de Economia e Management de l’Università de Trent; Paolo Bouquet dozent e enciarià al sport e a la Olimpiades 2026 de l’Università de Trent; Mirko Bisesti assessor provinzièl a l’istruzion e Università; Tito Giovannini comember del Consei de Aministrazion de la Fondazion Milan Cortina 2026; Gianluca Cavada e Pietro De Godenz conseieres provinzièi; Giovanni Zanon comissarie de la Comunità Teitorièla de Fiem; Giuseppe Detomas procurador del Comun general de Fascia e Maria Bosin presidenta de la conferenza di ombolc de Fiem.
Vegnarà rejonà en particolèr de doi projec: l’endrez de corsc a distanza de l’Università per ge jir encontra a chi studenc che stenta a tor pèrt a la lezions a Trent e la creazion de infrastrutures tecnologiches leèdes al stadie del saut de Pardac e chel de paslonch de lago de Tieser che posse vegnir durèdes per la Olimpiades ma ence tel davegnir.
La scontrèda »L’Università de Trent te la valèdes de la Dolomites« taca ite da les 12.30 e la vegn manèda fora su Radio Fiemme en direta e en streaming su la piata Facebook de la radio.
(Monica Cigolla)
