La Usc di Ladins

L’é na vita sfadiousa, ma cernuda per pascion e per amor, e Roberta no la mudassa con nesciuna autra. Da 16 egn la porta inant l refuge Roda de Vael, dant con so om Bruno e da 10 egn da soula.

Roberta la vegn da Bergamo. Da semper pascionada de monc, per doventar maestra de brea l’aea cognosciù Bruno Deluca che l’era istrutor nazional e per amor del 2002 l’à dezidù de vegnir te Fascia per scomenzar na vita ensema. Dapò l’é ruà la gestion del refuge de la SAT sun Vael, l prum fi, e ai 29 de messal del 2011, canche Emilio aea 2 egn e n’autra vita tacaa a crescer tel gremen de Roberta, n azident sa mont se à portà demez Bruno per semper.

»No é pissà nience per n moment de molar – la disc. Chela l’era doventà noscia ciasa e me saea che fossa stat n tort te si confronc, valch che fossa jit contra a soa pascion, a soa vijion de noscia vita. É dit »gio proe«. L moment più dur l’é stat proporio al scomenz, canche no saee amò se i me aessa lascià jir inant. I me l’à dit a la fin de la sajon, de otober. De jené l’é nasciù Agata e d’aisciuda son jita su coi bec. Da chel moment l’é stat dut più sorì. Ben segur l’era n muie de robe che ge stajea dò Bruno e é cognù me far ite, ma é semper troà amisc desponiboi che me à spiegà e me à dat na man e chest me à didà n muie. Ence con dut l staff te refuge l’é semper stat desché na familia.

No veide l’ora de jir su, te mia ciasa auta, son stata su ence l’auter dì a veder la situazion, l’é sù amò n cul de neif, ma ai 29 de mé verje. Per me chel no l’é demò n lurier. Desché gestora de refuge me sente mingol desche la ‘custode’ del chel picol regn maraveous che é entorn e me piasc poder ge verjer l’usc ai amisc che rua su.«

Te la »ciasa auta« l’é amò dut scur e freit, Roberta la rua sun Vael con Spritz. L cian ge va semper dò, l’é doventà mingol so vardian. L’era con Bruno chel dì, l’à vedù l’azident e da enlouta l’à mudà modo de far. Ogne sera l va te cambra e per n pec de menuc l stasc lo, apede ela, fin canche no l veit che l’é dut scur e chiet, dapò l va fora a dormir te so post.

L regist Andrea Azzetti, che l’à n gran amor per i cians, l’é restà tocià da chest e coscì ence Spritz l’é doventà protagonist, en prum pian ence sul placat.

Se enterza tel filmat l paesaje con vedude da marevea e moza, l refuge con la legreza del staff e l lurier sfadious, le emozion con le telefonade douce di fies e i momenc de solentum.

L film é stat manà fora a Trent en sabeda prum de mé. L film »Con il sorriso« é desponibol per la prenotazion online sul sit del Filmfestival. Duc i film pel vegnir prenoté ma per no più che 500 visualisazion, e per chi sot i 30 menuc (chest l’é de 26 menuc) la prenotazion online la é debant. Dapò chest istà cognessa vegnir programà una o doi sere de prejentazion te Fascia per endrez de l’APT.

De più su La Usc stampèda de en vender ai 7 de mé del 2021.


 (Lucia Gross)