La Usc di Ladins

L’é zeche de natural che n bez, canche l se fèsc mèl e ge vegn da vaèr, l core da sia mère, olache te si brac semper l se sent più fort e al segur. L’é chest che l’é dò amedit a suzeder tel mond, no demò te chisc ultimes tempes dessaté dal coronavirus, ma da egn. Noscia sozietà, l vedon ogne dì, la se destaca semper de più da l’ambient naturèl, da sia reijes biologiches. Se se destaca a livel fisich e mental, ma ence sozièl, jan encontra a n sentiment de estraneità e a desfèr nosc medemo habitat global. Chest tant l’é sostegnù da l’ejit semper maor che se à vadagnà l moviment per l’ambient #fridaysforfuture peà via da la joena svedeisa Greta Thunberg. Te chesta ultima dejines de egn chisc movimenc à ciapà ousc, fosc ades se rua a entener olache nosc svilup e aroganza i é dò a ne vidèr, dò na strèda zenza sortida. Pisson a jir sun etres pianec enveze che restèr chiò a rencurèr nosc medemo vidor!

En pèrt l’é chest un di obietives de la raides de Bioagrimont, na scomenzadiva provinzièla: l’é fèr descorir che la natura la é chiò e la ne deida, che no ocor jir dalonc per se sentir a cèsa, che la é emportanta e l’é nosc doer la stravardèr. Esser e stèr a contat con l’ambient l’é desche stèr apede e se arvejinèr a noscia vera natura umana. 

La seconda raida de Bioagrimont à fat tapa ta Penia en sabeda ai 26 de jugn, l’é stat n viac a la descorida de erbes e cognoscenzes de la Dolomites. L’enconter é stat avert dal diretor de l’ofize de produzion biologica de la provinzia de Trent Diego Bleggi che à prejentà en curt la normativa che revèrda chest mond. La compagnadora da mesa mont Erica Bernard da Cianacei à dapò vidà esperc e partezipanc da la vila de Penia fin sal Vera e da ló fin te Ciamp Trujan e ju de outa fin fora a Penia. Erica l’à portà dant picola curiositèdes en cont a inomes de piantes e lesc fascegn e ladins apede ence a la proprietèdes de la erbes. Enteressant l’é stat cognoscer la doura de chesta erbes che la jent da chiò fajea zacan, canche no l’era medejines.

De più su La Usc stampèda de vender ai 2 de messèl.  (Nicoletta Riz)