La Usc di Ladins

L’istà del 2020 l’é stat particolèr, con n muie de evenc sburlé o descancelé per la pandemia. Ades somea che se vae pian pian envers la normalità e dachelanvìa ence i calandères de la manifestazions se à empienì. 

Anter la scomenzadives che met dant i Comitac e autra sociazions o gropes de spas e cultura, l’é ence chi de la Comiscion per la cultura, l’ecumenism e l dialogh interreligious de la parochies de Fascia che à endrezà la 12^ edizion de la rassegna »Ispirazions d’istà«. 

Chest’outa l calandèr é belebon rich con adertura nef apuntamenc slarié fora te duc i paìjes, endrezé dai volontères de la parochies col coordenament de Cesare Bernard e l sostegn di preves don Andrea e don Mario e col prezious didament di Comitac manifestazions e de l’Apt de Fascia.

La Comiscion per la cultura la se à dat jù via per dut invern e aisciuda a meter jù l calandèr, travers scontrèdes online. L’é n grop de jent che te chest ultim an se à ence en pèrt renovà. A raprejentèr la parochia de Ciampedel al post de Stefano Riz l’é Ilaria Ragnes, per la parochia de Poza al post de Riccardo Zulian l’é Serena Zacchia e per la parochia de Moena ensema a Ilaria Petrone l’é ence Angela Chiocchetti. Apede ic l’é Elisa Salvi, Christina Depaul, Cesare Bernard, Andrea Rizzi e Monica Cigolla.

I evenc vegn endrezé da les 21.00 e i taca ite en mercol ai 14 de messèl al PalaDolomites de Ciampestrin con l Piscop de Trent Lauro Tisi e Roberto Battiston, ordinarie de fisica sperimentèla a l’Università de Trent che rejona sui segnes lascé da la pandemia.

L program entriech é a la leta ence su La Usc stampèda de vender ai 9 de messèl.