La Usc di Ladins

Anché, vender ai 16 de messèl da les 11.00, te l’auditorium de Palaz Paolo Prodi a Trent, l’é la zerimonia de conferiment de la laurea magistrala a titol de onor te European and International Studies a Antonio Megalizzi, l joen reporter radiofonich, redator de Europhonica, copà te l’atentant a Strasburgh ai 11 de dezember del 2018.

Antonio Megalizzi l’era na persona che cherdea trop tel projet european e l lo desmostrèa ogne dì con sie lurier. Si ideèi no é morc con el ma i é stac porté inant da la Fondazion Antonio Megalizzi metuda sù con l sostegn de sia sor Federica che é vizepresidenta. »Con so empegn e so lurier l’é stat bon de ge dèr gaissa a n muie de persones. E l seghita a ne dèr gaissa ence a nos« à dit Federica.

La zerimonia, a chela che tol pèrt l president de la Republica Sergio Mattarella, vegn averta dal salut del retor de l’università Flavio Deflorian, sobito dò l’é l’intervent de David Sassoli president del Parlament european. La laudatio per Antonio Megalizzi vegn fata da Andrea Fracasso proretor a la programazion e ressorses e jà stat diretor de la Scola de Studies Internazionèi e la letura de la rejon per l conferiment de la laurea a titol de onor vegn portèda dant da Stefano Schiavo diretor de la Scola. Dò la consegna ai familiares de Antonio l’é en program l’intervent de Luana Moresco presidenta de la Fondazion Antonio Megalizzi.

A la zerimonia pel tor pèrt demò chi de cèsa, l’autoritèdes e i componenc de la comunità universitèra ma duc pel la veder en direta sul canal YouTube de UniTrento.

 (MCI)