La Usc di Ladins

L’é stat n bel domesdì per cognoscer e ge far cognoscer ence ai ghesć l valor de nesc artisć e la musicalità del lengaz ladin, chel endrezà en mercol prum de setember te sala del Consei de Comun de Moena dal Grop Ladin e l’Union di Ladins ensema con l’aministrazion del paisc, col titol »Intrecci di poesia e musica ladina«.

L’event, nasciù da na idea de Annalisa Zorzi, à abù desche protagonisć trei gregn artisć moenac jà festejé chest an: prum de dut l poet Valentino dell’Antonio, più cognosciù desche Tinoto Monech, ma ence l componist Luigi Canori e l’artist Zerilo dell’Antonio Bora.

La scontrada se à avert con la ciantia ‘Moena tu es noscia stela’, scrita dal Canori e portada dant da le bele ousc de Angela Chiocchetti, Luisa Chenetti, Stefano Volcan e Martin Bernard del quartet »Demò ousc«, compagné al piano dal maester Paolo Bernard. Dapò la vizeombolta de Moena Cristina Donei à saludà l publich che empienia duc i posć desponiboi te la sala e l’à prejentà en curt le neve produzion ladine che à dat l’ocajion de chest event: l CD del Canori »Cianzon da mont, da spas e dal cör«, la riedizion agiornada e ampliada del liber »Dò l troi de la speranza«, che regoi le liriche del Tinoto Monech e l liber su la Scola d’art del Zerilo Bora.

Le trei publicazion é da poder troar te senta de l’Union di Ladins de Fascia a Sèn Jan; l liber de poesie del Tinoto Monech pel vegnir domanà ence te la senta de Moena de la Cassa Rurala Dolomites, che la ge l sporc debant a si sozi.

De più su La Usc stampèda de vender ai 10 de setember.  (Lucia Gross)