La Usc di Ladins

Duc i capifech de Pera é chiamé en domenia ai 19 de setembera a jir a litar si raprejentanc tel Comitat de la Frazion. La pruma litazion, stata ai 6 de jugn, no aea abù ejit: per demò 9 stime no l era stat arjont l quorum del 50% pervedù da l’art. 4 coma 5 del Statut de la Frazion. En dut aea lità l 46,85% di 286 capifech che aea derit. 

L Comitat de la Frazion, vidà da Claudio Bernard, à envià i capifech en vender sera te Caserma di Studafech de Vac per portar dant mingol de bilanz de l'atività fata ti egn passé e i lurieres che à besegn de vegnir fac.
L é stat egn no sorii - à dit Bernard - condizioné debel dal tormen Vaia e ades dal becherle, situazion n muie pesoche per l bosch che nesciugn era enjignà a gestir. La Frazion de Pera à n teritorie senester, aon cognù se enjignar le strade per poder ruar apede coi camion a portar demez le bore. A la fin sion stac bogn de n vegnir fora menomal, aon librà duta la part a man dreta, de Pra Repe e Gardecia, e speron inant che sie fora l invern de ruar a fenir ence Jumela. Ampò de segur se assane abù più didament da man de la stazion forestala o se fossane stat bogn, descheche gio aee proà a domanar, de se meter ensema anter Comuns, Frazion, duc i aministradores de bosch de Fascia per tor n tecnich che se cruzie de le tratative con le gran firme foreste del setor, assane podù n vegnir fora duc n muie miec. Pecià che duc peissa de esser miores a far enstesc... ades peisse che duc aesse podù veder che no la é coscita.
Ades l é do a vegnir fora pesoch l problem del becherle - à dit amò Bernard - l é lurieres che se cogn far en prescia e ti ultimes meisc l Comitat à podù far demò la aministrazion normala, zenza poder deliberar perché l aea fenì so mandat.
Per chest - l à fenì fora - l é emportant che duc i capifech vae a litar en domenia, perché Pera no pel se permeter de restar amò ceta, fossa n gran dan per duta la comunanza

Se pel jir a litar, te la palestra de la veia scola don Edy Cinzol, da le 9 da doman fin le 8 da sera. Se pel dar ju fin a 5 inomes e percheche no cogne vegnir anulà stime l é miec meter apede al inom e l cognom ence l sorainom. 

Apede ai 5 componenc del Comitat jit fora, Claudio Bernard de Tito de Nato, Norbert Bernard d Moch, Ivano Florian de la Rosa, Luca Rasom de Onz e Federico Zanet dal Poz, te la medema squadra se à metù a la leta ence Pietro Bernard de Franco, Francesco Furci, Moreno Rizzi de Salin e Andrea Winterle de Zilia. A na vida autonoma e indipendenta se à candidà ence Armando Mich ampò, desche semper te le litazion de le Frazion, duc i capifech pel vegnir lité.

 (Lucia Gross)