La Usc di Ladins

Do l’inaudazion del meis de messèl passà e la pruma ativitèdes metudes a jir via per chest istà, l’identità e l projet del bar del zenter sportif a Sèn Jan é dò a ciapèr forma, de gra a la condivijion di desvalives partner del teritorie.

Defat, aldò del projet #Fuoricentro, l Comun de Sèn Jan e l Comun general de Fascia se à metù adum per poder sperimentèr na modalità neva de valorisèr n ben de la comunanza, ensema con la Copratives sozièles che laora sul teritorie.

L Comun de Sèn Jan à metù a la leta debant l bar te la strutura sportiva, con chela de fèr de chest n lech de agregazion positiva che era stat chiamà ‘Bar educant’ e che de gra a la bona colaborazion con l Comun General de Fascia e sie Servijes Sozio-assistenzièi e con la Copratives Le Rais e Inout e de autra istituzions e sociazions de Fascia se à metù dant desche n spazie sozièl emportant e n lech de formazion al lurier per persones che fajessa fadia a troèr lurier te n auter contest.

Fenida la sajon da d’istà i desvalives partner à metù dut sie empegn per peèr via con gaissa con neva idees e scomenzadives per viventèr chest lech de agregazion sozièla, che ades l à ence mudà inom, passan da chel provisorie e mingol ‘pesoch’ de ‘Bar educant’ a chel più sorì e lijier de ‘Cotura Café’.

L nef inom é stat cernù anter la proponetes ruèdes ite da n concors de idees metù a jir anter i studenc de la Scola Ladina, tegnan cont donca ence del inom tradizionèl del scito de Sèn Jan olache l é ence l ciamp de balon de la squadra de Fascia.

N nef inom, ‘Space’, é stat cernù ence per defenir l zenter de agregazion che à avert con en lunesc ai 18 de otober per endrez de la Coprativa Inout e che l é dò a vardèr de meter ensema n program de scomenzadives.

De più su La Usc de en vender ai 22 de otober del 2021.  (LG)