La Usc di Ladins

Acà trei egn la net anter i 29 e i 30 de otober Vaia à dessatà passa 19 mile etares de bosch te la provinzia de Trent. L à crepà e dejarià i èlbres ma no l à dobià la jent che se à tirà ite la mènies e la se à dat ju per la renasciuda del bosch. 

L à inom belapontin »Vaia: l valor de la renasciuda« l event che à endrezà dai 28 ai 31 de otober le Apt de Fascia e Fiem per recordèr chel che l é stat ma ence per rejonèr de chel che da bel l é nasciù te chisc 3 egn.

En sabeda passèda te teater de Navalge l é stat l »Vaia Lab«, n moment rich de idees e de condivijion anter istituzions, sociazions, scoles, firmes e privac che se à confrontà e à prejentà si projec.

La sera é stata averta da l’opera sonora »Eraus« de Irene Tretter che à fat jir endò duc chenc a chela net da spaent. »Vaia l é stat n event dramatich che à mudà noi e nosce val - à dit l ombolt de Moena Alberto Kostner - no podon più far mena de nia tedant a l’emergenza del mudament climatich.« Paroles che é states sotlineèdes ence dai doi presidenc de le Apt de Fascia e Fiem Paolo Grigolli e Giancarlo Cescatti, che à uzà fora l valor de la colaborazion anter la doi valèdes che pel se concretisèr ence te etres setores emportanc.

Travers l video »La notte di Vaia«, fat dal giornalist Andrea Selva del 2019 per la Cambra de Comerz de la Provinzia de Trent, se à podù sentir la oujes de la jent e di socoridores, sentimenc de poura che à ressonà amò più forc con la testimonianza del President de la Federazion di Studafech del Trentin Giancarlo Pederiva che à contà del gran cruzie de chela net che vae per sora la Veisc ma ence de la meta vegnuda ju ta Dèlba che à portà dans a cèses e cevenes. »Gio en chela sera era te auto e vegnie da la val ju - à dit Giancarlo Pederiva - ta Mazin vedee le ponte di albres che se tociaa dal gran vent, no saee se jir inant o me fermar, gio die che no son mai jit tant coran.« Piena de sentimenc ence la letra che à scrit Stefania Zorzi del Hotel Nele de Juan che é stata leta ju e interpretèda da Elena Osler.
Ma do i recorc, l é stat metù dant ence i sacotenc intervenc realisé.

De più su La Usc stampèda de vender ai 5 de november.  (Monica Cigolla)