La Usc di Ladins

La Musega da Vich l é la più veia de Fascia. L era defat l an 1820 canche l organist Giovanni Battista Detomas de Pantalion l à metù ensema ofizialmentert la pruma Sozietà di diletanc de musega.

Per festejèr l cedean emportant di 200 egn, la sociazion aea endrezà na lingia de evenc, che ampò i é stac en gran pèrt feré dal Covid. L projet de maor emportanza pissà per l cedean l é stat de segur l nef Cd, alfa e omega: l é stat cernù apontin la pruma e l’ultima letra del alfabet grech per sotrissèr dut l percors, dal scomenz veior enfin anchecondì.

Ades, do i lonc meisc de limitazions che à penalisà a na vida particolèra i conzerc e i spetacoi, zacan l moment é ruà e la Musega da Vich pel jir de nef dedant a la jent. 

Per chesta ocajion tant spetèda l é stat pissà de no fèr demò n conzert per prejentèr l CD nef, ma de meter a jir n spetacol olache la longia storia de la Musega da Vich vegn descomponuda travers i recorc, i momenc gustegoi e chi da emozion che à segnà chisc 200 egn de la banda, anter fac de la jent de n picol paisc da mont, gregn mudamenc storics e ben segur la notes, desche la tesseres de n mosaich che metudes una apede l’autra dèsc vita a n chèder da maravea.

En sabeda ai 13 de november da mesa les nef da sera tel teater de Navalge a Moena duc i sonadores sun paladina portarà dant donca apontin n mosaich con n muie de tesseres che crearà l simbol cernù per chest maraveous cedean e farà sentir ogne spetador desche na picola tessera de chest bel mosaich.

De più su La Usc stampèda de vender ai 5 de november 2021.   (Lucia Gross)