N bel soreie ciaut, l fech per chejer mingol de castagnes e l confront anter amisc leé da la medema pascion per la mont e la solidarietà, à sciudà ite en domenia passèda, te n domesdì seren ma belebon freit, l piaz dedant a la palestra de rampinèda ADEL jun Ischia a Ciampedel e l cher de duc chi che se à binà aló.
N bel grop de volontadives de duta trei la Stazions del Socors de Fascia à tout su defat l envit de la sociazion Fascia Climbing, che à volù ge sporjer ai socoridores na ocajion per stèr adum te na situazion serena e aiegra, no per na emergenza, per poder ence se rejonèr a na vida informala de desvaliva costions.
Mario Prinoth del Fascia Climbing à sotlineà la bona colaborazion che lea la sociazion de rampinèda con l Socors. I volontadives à defat l met de se tegnir semper arcedé te la palestra de Ciampedel a condizions spezièles e l fat che n numer semper maor de joegn i posse se arvejinèr a la rampinèda e fèr crescer sia capazità te chesta strutura emportanta jun Ischia l é segur emportant per smaorèr l numer de chi che dezide de doventèr volontères del socors.
Da chest l é vegnù fora la idea de endrezèr chesta scontrèda sot chela letres ADEL, che tegn semper vif l pensier e l recort de Alex, Diego, Erwin e Luca e de duc i socoridores morc sa mont.
La scontrèda l é stat la ocajion per meter dant i dac sui intervenc via per chest an e la neves sul component doventà da pech istrutor regionèl e sun doi projec per la strutura che l Fascia Climbing spera de poder portèr prest a compiment, col sostegn de finanziamenc publics.
De più su La Usc stampèda de vender ai 12 de november. (Lucia Gross)
Socors da mont e Fascia Climbing adum tel recort di cater amisc
La sociazion de rampinèda à envià i volontères del Socors da mont de noscia val a n domesdì lo da la strutura de Ciampedel dedichèda a Alex, Diego, Erwin e Luca, per valorisèr la bela colaborazion e l prezious lurier che i fèsc.
Galaria retrac
View the embedded image gallery online at:
https://www.lausc.it/valedes-ladines/fascia/17736-socors-da-mont-e-fascia-climbing-adum-tel-recort-di-cater-amisc#sigProId371b877fbe
https://www.lausc.it/valedes-ladines/fascia/17736-socors-da-mont-e-fascia-climbing-adum-tel-recort-di-cater-amisc#sigProId371b877fbe