La Usc di Ladins

L é l bel vis grignolent de Caterina Ganz, la joena atleta de paslonch jita ai Jeghes olimpics de Beijing, a saludèr i letores da la soracuerta del ultim numer de Nosha Jent.

Chest boletin, fat da na redazion de volontères metuda ensema dal Grop Ladin da Moena, l compagna oramai da beleche 60 egn soraldut i moenac, chi che stèsc te paisc e chi a la foresta, con cater numeres fora via per l an che la jent speta con gust. L é n codejel che met dant vèlch informazion, ence se no leèda a l’atualità strenta ajache l vegn fora vigni 3 meisc, ma che soraldut per chi che stèsc fora de val pel esser ampò neva, e etres scric de desvaliva sort. 

Do l renovament del diretif del Grop Ladin d’uton del an passà, l é stat vardà de tor ite ence jent joena e de se slarièr semper de più ence sorafora l paisc de Moena, te duta Fascia.
Sun chest numer troon anter i etres l contribut de la joena Elisa Zanon Bora che ne rejona de èrt e chel sui molins de Luca Zacchia de Sas, che ensema col scrit sul liber »I colores del temp« de don Bruno Daprà, dat fora dal Grop e prejentà te duta la val, l renforza l leam anter Moena e Fascia.

L boletin Nosha Jent ge vegn dat a duc i aboné e sozi de l’Union di Ladins de Fascia che à enteres a l aer. I pel jir a se l tor te la Senta de l’Union di Ladins de Fascia a Sèn Jan o domanèr per mail o per telefon (union@ladinsdefascia.it; 0462 764545) de se l fèr manèr en format pdf.

De più, ence sun Luca Zacchia e l Molin de Sas é da poder lejer su La Usc stampèda de vender prum de oril.  (LG)