La Usc di Ladins

En lunesc ai 11 de oril te la sala grana de la Sorastanza de la scoles de Fascia i studenc de la quinta classes di Licees à abù l met de scontrèr una di treicentevinteun Senatores de Palaz Madama: la fascèna senatora Elena Testor.

L obietif de la scomenzadiva, metuda a jir da la professores Lidia Rasom e Mariagrazia Degasper, l era prum de dut chel de arvejinèr i joegn al mond de la politica, vardan de ge portèr dant na esperienza de livel nazionèl: na realtà che pel someèr dalonc da la realtà da duc i dis di joegn de Fascia, ma che enveze, coche l’à sotrissà più outes la senatora Testor, l é na costion che revèrda da vejin ogne sentadin e sentadina.

L confront anter i studenc e la Senatora da Ciampedel é peà via da la storia del percors politich e personèl de la raprejentanta tel Parlament: da mère e imprenditora te val a Procuradora del Comun General de Fascia e en ultima pruma femena ladina al Senat de la Republica.

De più su La Usc stampèda de vender ai 29 de oril.  (Karin Pellegrin)