La Usc di Ladins

N fort batiman se à levà da la sala a la fin de la radunanza de la sociazion Rencureme, per ge dir n gran develpai ai volontadives che oramai da n muie de egn i se dèsc ju per ge dèr sostegn a chi che vif situazions senestres te Fascia e Fiem, semper con competenza e desponibilità.

I era de n bon pec en vender ai 29 de oril te la sala del Consei de Comun de Moena, duta bela metuda a nef, i sozi de chesta realtà emportanta. Rencureme l é na organisazion de volontariat nasciuda jai egn da n grop de jent che à vivù en pruma persona l problem de aer te cèsa zachei che se mèla de Alzheimer o che pert la capazità del cef tant da no poder più per se, e che i se à pissà de fèr zeche per l ressolver. I à metù su chesta sociazion che l é doventà semper de più n pont de referiment prezious, per duc chi che à te familia chest problem, ma ence per n muie de auter, travers la colaborazion con esperc e con de autra sociazions.

La lo à sotrissà ence la vizeombolta de Moena Cristina Donei, che à portà l salut e l develpai de l’aministrazion a duc i prejenc endèna la radunanza prejentèda dal vizepresident Roberto Nizzi.

La presidenta Annalisa Zorzi à portà dant la relazion su l’atività metuda a jir via per l an 2021, enceben che amò condizionèda debel dal Covid, te chel che l é vegnù ite 23 neves sozi, che ades en dut i é 241.

Dut l articol é da poder lejer su La Usc stampèda de vender ai 6 de mé.  (Lucia Gross)