Ai 5 de aost del 2022 sarà n’autra dì da recordèr per Fascia: inantmesdì la val se à strent amò n’outa dintorn ai parenc tel recort de la vitimes de la Marmolèda, do n meis da la tragedia dai 3 de messèl e da sera l’à cognù se tor dant n’autra emergenza, la gran pieveta che à caujà smolinamenc e roes te n muie de posć anter i paijes de Vich e Ciampedel.
Belapontin en vender passà la Jonta de la Provinzia de Trent à volù se troèr a Cianacei per sia sentèda ordenèra a desmostrazion de la vejinanza a la comunanza de Fascia, tel recort de la 11 vitimes, per ge sporjer l rengraziament ai operatores de la squadres de socors e de enrescida ma ence per fèr na reflescion sul besegn de se dèr ju per na maor consapevoleza del risech per chi che vel jir sa mont.
A Cianacei l é ruà ence l capo del Departiment de la Protezion zivila nazionèla Fabrizio Curcio, l comissarie del Goern Gianfranco Bernabei, apede ai raprejentanc istituzionèi del Comun de Cianacei, del Comun general de Fascia, de la Provinzia de Trent, del Consei provinzièl, de la Region Trentin-Sudtirol e Venet e de la Fondazion Dolomites Unesco.
N braciacol fort a la families che à perdù chi de cèsa te la tragedia e a duc i volontères che per na setemèna entria se à dat ju te la enrescides: l Socors sa mont e speleologich, i Studafech de duta Fascia, l Corp permanent di Studafech de Trent, la Finanza, la Polizia, i Carabinieres, i Psicologs per i Popoi e Nuvola.
Do la sentèda de Jonta i é jic duc sun Fedaa olache don Mario Bravin à benedì la Marmolèda e la vitimes.
De più su La Usc stampèda de vender ai 12 de aost. (Monica Cigolla)
Marmolèda, n meis do l recort de la vitimes
La Jonta de la Provinzia de Trent con raprejentanc de la istituzions nazionèles, regionèles e de val se à binà te Comun de Cianacei e dapò sun Fedaa per benedir l giacé, recordèr la vitimes e ge sporjer l develpai ai socoridores.
Galaria retrac
View the embedded image gallery online at:
https://www.lausc.it/valedes-ladines/fascia/20541-marmoleda-n-meis-do-l-recort-de-la-vitimes#sigProId7e2e031b06
https://www.lausc.it/valedes-ladines/fascia/20541-marmoleda-n-meis-do-l-recort-de-la-vitimes#sigProId7e2e031b06