La Usc di Ladins

Doi gregn tubi che vegn ju da Chieva a Poza e i traversa l stradon vejin a la rodadoa de Meida, con n picol col per passèr soravia coi auti, l é l soul segn che, 2 dis do l dejaster, ge recorda a duc l gran dan de en vender ai 5 de aost, canche entorn les set da sera l é crepà na nigola.

L é sozedù dut de colp, porprio tel medemo dì che a Cianacei era ruà duta la Jonta provinzièla e l capo del Departiment de la Protezion zivila nazionèla Fabrizio Curcio per recordèr n auter event dramatich, chel di 3 de messèl sun Marmolèda.

Chest’outa per grazia nesciugn à perdù la vita o se à fat mèl, ma la tema e l dan é stac gregn. Te n’ora l é vegnù ju passa 100 milimetres de èga ciapan ite dut l front sot l Ciadenac, da Vich enscin a Ciampedel. Duc i ruves che vegn ju su la dreta orografica de la val, da Duron a Udai e Soal i fajea poura, l Ruf de Marisena sul tegnir de Mazin é jit sorafora e en dut l é vegnù ju passa 50 metes, la maores con smolinamenc che à portà èga, mauta e èlbres fin jun stradon.

L trafich sun stradon é stat blocà e per segureza 211 persones à cognù se n jir fora da sia majons e ence da vèlch hotel, a chestes ge é stat enjignà per poder stèr soranet te la palestra de la scola mesènes de Sèn Jan, olache la Crousc Checena de Fascia à metù ju e endrezà la brandes metudes a la leta dai Studafech di distrec de Fascia e Fiem.

De più su La Usc stampèda de vender ai 12 de aost.  (Lucia Gross)