La Usc di Ladins

»Ades se fasc dassen e no sarà sorì«. L é la paroles del alenador de la pruma squadra del Fascia Balon, Luciano Cigolla, che aon domanà fora per saer la neves de chest nef campionat che tacarà ite en domenia ai 4 de setember sul ciamp de Cotura olache se endesfidarà Fascia e Audace. 

A la dir duta l é jà stat na partida, chela jièda fora en sabeda ai 27 de aost forin Juan contra la Cauriol. Se trata de la Copa Provinzia, sponsorisèda dal grop Dao Conad. L Fascia jia tel grop de cater con ite Dolomitica, Fiem e Cauriol. La squadra de Mister Cigolla à vent contra la Cauriol per 0 a 2 enceben che i aversaries se aesse batù desche leons. »Per l resultat son content – à dit Mister Cigolla – ma per coche l é stat jià n muie de manco. No l é stat na bona prestazion. Fosc gio la veide mingol massa grieva ma posse dir con segureza che chest nef campionat no l sarà per nia sorì.«

De più sun dut l organich de la sozietà per chesta sajon, ence per che l che vèrda la squadres mendres, é da poder lejer su La Usc stampèda de vender ai 2 de setember.  (Monica Cigolla)