La Usc di Ladins

L era ai 3 de mé del 1997 canche vegnia sotescrit la fradaa anter Vich e Remseck am Neckar. N paisc ladin e na zità todescia che à dezidù de se leèr ofizialmenter con chela de colaborèr e se didèr fora te desvalives ciampes e setores. A la dir duta la fradaa era tachèda jà diesc egn inant canche n grop de volontadives de la Crousc Checena de Remseck à tacà a vegnir te Fascia dant coi schi per tor pèrt al Meeting internazionèl su la neif e dapò per didèr chela de Vich en ocajion de la Marcialonga. Enlouta president de la Crousc Checena fascèna l era Gino Fontana e con el e sia femena Christine Gögele l é pontà via chela amicizia che à tout ite bele prest ence i Studafech con Helmut Wibel enlouta Comandant del grop de la zità todescia. 

Coi egn la fradaa se à slarià fora ence a livel istituzionèl, dant col Comun de Vich e ades con chel de Sèn Jan. N leam che ogne cinch egn vegn renovà con scontrèdes ofizièles a roda te Fascia e tel Baden-Württemberg, con scambies de informazions, de dons e ence de mesi, desche na pinza idraulica per i Studafech e na ambulanza per la Crousc Checena rué jà tempruma da la Germania. 

N raport che é stat emportant ence desche ejempie de fujion anter comuns ajache belapontin Remseck am Neckar l é n comun che bina adum 5 paijes: Aldingen, Hochberg, Hochdorf, Neckargröningen e Neckarrems. L’esperienza del percors de unificazion de chisc paijes l é stat un di desvalives aspec de utol per Vich per la fujion con Poza tel Comun de Sèn Jan e per duta Fascia col Comun General.

En sabeda ai 14 de otober a Vich vejin al pent che aldò de la fradaa à ciapà apontin l inom de Pont Remseck am Neckar l é stat i descorsc ofiziai e dapò vèlch moment de festa e condivijion informala. La domenia la messa con la benediscion di dons e de la targa de fradaa che é stata tachèda fora a l'entrèda de la Ciasa de Comun de Sèn Jan.

De più su La Usc stampèda de vender ai 21 de otober.


 (mci/lg)