La Usc di Ladins

L'APT de Fascia se cruzia semper de più ence de prodot e no demò de marketing, con projec e azions desche rencurèr i troes da mont e per la rodes, ajache chel che vegn ite da la steora de sojornanza no vegn durà demò per la comunicazion ma ence per i intervenc che serf a miorèr la perferida turistica.

Va de chest vers ence n’autra neva emportanta che é do a ciapèr forma ofizièla: la creazion de n nef Comitat per i gregn evenc te val, che é stat pissà, apontin sot l ciapel de l’APT, per l endrez de competizions e manifestazions.  

Vegn fat na sozietà che tol ite l’APT de Fascia col 48% de la quotes, i doi Consorzies di impianc portamont de Fascia-Ciareja e Lujia-Sèn Pelegrin col 20% vigniun e dapò 4 comitac o sociazions che à jà esperienza tel endrez de evenc de nonzech: l Comitat de la Enduro World Series (EWS) con William Basilico, chel de la DolomythsRun con Diego Salvador, chel de la Sellaronda Skimarathon con Oswald Santin e l Ski Team Fascia. Chisc 4 partner i va a fèr pèrt del Comitat col 3% de la quota vigniun per corir l 12% che vanza; i é stac cernui per setor de enteres, donca la roda, la corsa e i sport su la neif, e a chisc podarà fèr referiment ence l’autra sociazions che volessa endrezèr gregn evenc: chisc referenc i cognarà portèr la proponetes tel Comitat che dezidarà se les tor su e les portèr inant. La responsabilità finanzièla de chisc cater partners se fermarà donca al 3% de sia quota.

De più su La Usc stampèda de vender ai 2 de dezember.  (Lucia Gross)