Te Sala Belli de la Provinzia Autonoma de Trent l é stat portà dant i prumes ejic de la enrescida CLAM (Zimbres, Ladins, Mochegn) su la situazion di lengac de mendranza, metuda a jir en colaborazion co la Università di Studies de Trent. Con chesta enrescida se vel tor consaputa tant de coche vegn durà dalbon l lengaz de mendranza tel contest de la familia e publich, che ence la predisposizions di parlanc ti confronc del lengaz de sia comunanza.
L besegn de veder tel detai la situazion soziolinguistica l é vegnù fora no demò tel contest di desć de lurier de la mendranzes, ma ence aldò de na domana spezifica de l’Autorità per la mendranzes linguistiches. I dac vegnui fora da la enrescida i sarà de utol per lurèr fora la politiches linguistiches metudes a jir dai Istituc Culturèi e dal Comun General de Fascia, con intervenc ouc al stravardament e al renforzament del multilinguism te la comunitèdes de mendranza.
La dirigenta del Servije mendranzes linguistiches PAT Giuliana Cristoforetti à avert l confront portan l salut del president Fugatti e recordan che chesta scontrèda fèsc pèrt del projet “Dialoghes co la mendranzes”.
Do l’introduzion de la giornalista de Rai Ladinia Margherita Detomas à rejonà Vittorio dell’Aquila, linguist de l’Università Statala de Milan, Patrizia Cordin, professora de Linguistica generèla a l’Università de Trent, Fernando Ramallo, professor de linguistica de l’Università galiziana de Vigo (Spagna) e Sabrina Rasom, diretora del Istitut Cultural Ladin “Majon di Fascegn”.
La scontrèda, che se à podù veder en direta, la é a la leta sul canal YouTube de la Provinzia Autonoma de Trent.
Dialoghes co la mendranzes
Focus su la vitalità linguistica e la predisposizions de chi che rejona zimber, ladin e mochen.
Galaria retrac
View the embedded image gallery online at:
https://www.lausc.it/valedes-ladines/fascia/22200-dialoghes-co-la-mendranzes#sigProId2d6b86a6b9
https://www.lausc.it/valedes-ladines/fascia/22200-dialoghes-co-la-mendranzes#sigProId2d6b86a6b9