La Usc di Ladins

Chiara Mazzel, l’atleta da Vich de schi alpin paralimpich, la é ruèda enscin al Base Camp del Everest e l'à vedù coscita doventèr realtà sie gran ensomech. L meis passà, compagnèda da sie morojo Nikolaj Niebuhr e na amica de el, Anna Podgorska, la é ruèda enscin ai 5364 metres del ciamp, tel cher del Nepal.

Chiara l’à podù se goder n trekking dassen da marevea per ruèr fin japede l spiz più aut del mondo. Ponté via da Fascia via per la metà de oril, te la gran raida a pe i se à fat menèr da na guida del post e da doi portadores che ge slejieria dassen l russoch. Beleche na chindejina de dis a pe ma, descheche la ne à contà, no l'à padì trop la fadia.
Chiara sun sia piates social l’à ciarià desvalives retrac de chisc ambienc glaciai, ma ampò nos aon volù jir più a fon… e coscita la é stata che ge aon domanà fora de duta canta l’esperienza!

Che viac aede fat?

Via per la metà de oril sion partii col aereo e sion rué fin a Kathmandu, tel Nepal. Da lo, aon ciapà n sgol intern fin a Lukla olache l aeroport l à na pista de planaje sul ert. Dalajà che i disc che l é l aeroport più pericolous al mondo e ence Niko che l é jit via jà desvalive ute l me l aea contèda su al scomenz, aee mingol de poura ma a la fin l é jit dut dalvers.

Da Lukla aon scomenzà a jir a pe ogne dì, da le 4 a le 9, 10 ore en dì. A jir en su fin al Base Camp ge aon metù 10 dis ajache aon fat n percors più lonch enlongia chisc leghes da monc che l à inom ‘giro di leghes de Gokyo’. A vegnir en ju ge n aon metù demò doi dis, ajache aon fat n troi più curt e diret.

Duta la intervista a Chiara Mazzel su La Usc de papier de en vender ai 16 de jugn del 2023.


 (Nicoletta Riz)