La Usc di Ladins

11 femenes, 11 scritores. Te sala grana del Comun General de Fascia, en vender ai 8 de mèrz, te la Dì internazionèla dedichèda a la eles, i Servijes sozio-assistenziai e i Servijes linguistics e culturèi à chiamà ite 11 femenes scritores de Fascia per ge dèr merit per sie contribut sozièl e culturèl.
»A le femene volesse ge dir ‘no ve desmentià de pissar a voi, conzedeve la libertà de coltivar vesc ensomesc e de valorisar vesc talenc, descheche à fat cheste scritore – à dit dantfora la Conseiera de procura al sozièl Mirella Florian. Volon ge dar post a cheste femene de noscia comunanza che se à dat ju tel ciamp leterar, volon le far cognoscer miec e soraldut ge dir develpai per sie contribut. Care scritore cognon dassen aprijiar vesc scric, ve dijon de esser stolze del lurier che aede fat percheche scriver no l é demò valch de personal ma vel dir ence ge dar zeche ai autres. Crese che no sie sorì scriver, ma voi con forza, coraje, pazienza, costanza, convinzion e determinazion ge dajede ouc a vesc pensieres e podede esser stolze de i meter a la leta. Ge vel esser bone de se verjer ai etres, esser propositive, resiliente, no se lasciar sciotrir da nia e voi te voscia produzion leterara aede desmostrà de aer dute cheste carateristiche.«
Paroles de aprjiament e de gaissa che à envià la scritores à se fèr cognoscer miec, a meter dant sie scric, a condivider pensieres e emozions.
Evelyn Bortolotti, responsabola di Servijes linguistics e culturèi del Comun General de Fascia à prejentà una per una la 11 scritores.

De più su La Usc stampèda de en vender ai 15 de mèrz.  (Monica Cigolla)