La Usc di Ladins

Ai 14 de marz ogne an rua l ‘pi grech day’, la dì de la matematica, che vegn festejà te dut l mondo tras evenc e scomenzadive de ogne sort. Ti licees de la Scola Ladina da passa 10 egn per la festa di numeres dant che rue l’aisciuda vegn metù a jir te Sala grana de la Sorastanza na mostra scientifica, con chela che, a na vida gutegola e fora de anter, se posse arvejinar bec e gregn al univers de la scienza e mosciar l bel e l valor de le teorie che descrif nosc mondo. 

Chest an l percors espositif enaudà en jebia ai 14 de marz l à inom ‘Larga al ciel’ e l trata de astronomia, n argoment che duc à a cher e con chel che duc à amò abù a che far, ajache dute le sere zenza nigole l ciel da steile se palesa con marevea sora nosc ciaf, soscedan curiosità e emozion. 

Satelic, pianec, galassie, bujes fosć l é i protagonisć de le desferente sezion de la mostra che conta coche ti secoi l’astronomia la é cresciuda e la se à svilupà, ruan anchecondì a mosciar corpes del ciel zis dalonc, nasciui acà miliarc de egn, adertura canche era do a nascer dut l univers. 

La pruma part de la mostra conta di prumes popoi che aea l met de osservar l ciel demò tras i eies, zenza l didament de strumenc o tecnologie, e de coche le steile abie ispirà n muion de lejende e mic. Amò no se sà n muie de chel che se saea ti milenees dant de Crist per chel che revarda l studie del ciel, ma resta segnes de veiores calandares astronomics, desche per ejempie chel ingleis de Stonehenge, amò piens de mister. 

De più su La Usc stampèda de en vender ai 22 de mèrz.  (Thomas Zulian)