La Usc di Ladins

Le pröm fat é sozedü en lönesc sëra a Corvara, tratan che i Carabiniers dl post fajô controi tl zënter de paisc. Sciöche an lî dal comunicat stampa éra jüda insciö: te na plaza da parché de n bar iló dlungia, á i Carabiniers odü che n auto fajô manovra y é reflé ite te n ater auto chit. I Carabiniers orô pordërt jí a daidé, canche ai s’un á intenü che la ciaferia, na ëra de 32 agn dla provinzia de Pordenone, â zënza dübe boiü demassa. Atira ti ái fat le test, che á mostré n valur feter 5 iadi tan co le limo consintí. I Carabiniers ti á insciö tut la patënt y l’á dada dant pro la Procura dla Republica de Balsan. La ëra é spo gnüda acompagnada a ciasa.
Apresciapüch insciö ti éra ince jüda a n jonn de 25 agn dla provinzia de Trënt. Da n control normal s’un án intenü che al â ince ël boiü demassa. Tles döes proes che an ti á fat, él gnü fora n livel de alcohol de 2,25 pormile impröma y 1,45 pormile dedó.  (pablo)