La Usc di Ladins

Reflesciuns sön tesć de cianties pón se fá n gröm. Mo ma ël á scrit por vocaziun, ince religiosa, te na forma tlera y de livel te nosc paisc nazional: Fabrizio De André. Te söa jonëza ál studié iurisprudënza zënza stlü jö. Deache al ne s’odô nia tl dagní pro na mësa a lauré y do avëi lit Benedetto Croce che â scrit che vigni porsona scri poesies cina dejedot agn y chi che le fej do chësta eté, o che al é n dër poet o che al ne vel nia, ál spo tut la dezijiun da gní ciantautur. Rengrazié por chësc ál dantadöt söa oma che ti â scinché na chitara bele tla eté jona de catordesc agn. Al é romagnü tres fedel a söa vocaziun, ince sce al se sontî spau dan al publich, chësta tëma ál impormó despassé a na certa eté. Scrit ál dla emarginaziun, di ultimi y dl’anarchia. Cianties desco "Andrea si è perso" o "Il pescatore" á arjunt na gran popolarité, ares ti á porte suzes deache ares ne plajô nia ma por le ritm musical, mo dantadöt por le contegnü dla poesia. An ne pó nia dí, che al ne sides nia gnü critiché, y i traficanc de porsones dla Sardegna ti á tut por n pez söa gran liberté. Chisc é stá por ël momënc tragics che al á elaboré cun fadia y cun na gran profescionalité d’espresciun por ci che reverda i tesć che al á scrit do chësc avenimënt. Por me édl ince desche la Pivano l’á nominé: le plü gran poet de tesć de cianties talianes che i ún albü te nosc paisc. Y la Pivano â na gran esperiënza de tesć, ára pö translaté i poec dla Beat Generation americana: a ëra pón ti creie!

Simon Josef Rubatscher, Longega