La Usc di Ladins

Püc dis do che la Junta de comun â nominé le dr. inj. Hansjörg Letzner desco colaudadú tecnich aministratif di laurs fac dala dita cina sëgn y che fej pert dl 1. lot, ti á le Consëi de comun ciaré plü avisa al secundo lot dl proiet, cun la condiziun da mudé la sotrata dles falzades esternes dl frabicat.
Le proiet vëgn lauré fora dai architëc Albert y Armin Colz cun stüde a Balsan. Al prevëiga la costruziun de na garasc te tera, l’ingrandimënt dl magazin di stodafüc y magazin por l’Aiüt Alpin ala pröma alzada, y la realisaziun dl local dles proes por la Müjia y de chël por le Cor de dlijia da Corvara tla pröma alzada. Le pröm lot reverda la costruziun dla garasc te tera, le secundo – aprové dan otedé – i atri laurs cun lapró ince la realisaziun dla plaza "naturala" suraía.
Le Consëi de comun s’á dé jö ince cun l’estetica dl frabicat nü, se aodan che les falzades esternes vëgnes en pert sotrates atramënter co che le plann di architëc le prevëiga.