La Usc di Ladins

Cun en lönesc á la Ciasa de Palsa »Ojöp Freinademetz« da San Martin tut mosöres plü strëntes de precauziun y prevenziun dal »coronavirus«. Sce al ti ê cina al’edema denant ciamó conzedü a un n familiar su da jí a ciafé n berba o na mëda dla ciasa, vëgnel sëgn stlüt les portes daldöt por i familiars. Chësc nes vëgn confermé dal dotur de ciasa Eduard Agreiter, che é ince responsabl tla Ciasa de Palsa por chisc provedimënc. »Aladó dles diretives nöies ne m’infidi nia plü da lascé ite d’atra jënt tla Ciasa de Palsa«, dij le dotur Agreiter. N provedimënt che é gnü tut por sconé dantadöt i berbesc y les mëdes, tocai pö pro les categories plü al prigo da chësc virus nü. Ezeziuns vëgnel ma fat te caji particolars, p.ej. sce al foss berbesc o mëdes che patiss dër dassënn. Mo ince te chisc caji él preodü da tigní ite dötes les normes de precauziun.

La colm tla Val Badia s’aspeton pormó
Le dotur Agreiter fej ince n apel ala jënt da se tigní ai 10 punc de precauziun che le Ministére á dé fora (ciara dessot) y inviëia da nia bagatelisé la cossa: »I n’ó nia fá gní sö panich, mo la cossa é valgamia seria. Chësc é döt ater co na picia coia. Sciöche ara é incö tla Talia (lönesc 9 de merz, adr), unse le 5,73% di amará che mör, chësc é cotan deplü co pro na coia normala.«
Le dotur Agreiter arata ince che la colm dl virus mësses pormó gní tla Val Badia: »Te Gherdëina án bele sëgn na situaziun bindebó zitia. Tla Val Badia s’aspeton la colm bonamënter te n pér de edemes.« Le dotur Agreiter spera che al vëgnes tosc fora n test che dá n resultat plü asvelt, por podëi insciö reagí plü ala snela. »Chël foss ideal«. Le dotur recorda ince che jënt che á sintoms de borjú, strüscia, me tl col y tos ne dess nia jí de porsona dal dotur de ciasa o tl pröm aiüt, mo tó sö contat cun le dotur tres telefonn, ince chësc por prevení infeziuns. Te Gherdëna é cater doturs atocá dal virus. 

Les 10 regoles
Chëstes é les 10 regoles dades fora dal Ministér dla Sanité, che düc canc é inviá da tigní ite.
• 1) Lavete gonot les mans;
• 2) Ciara da evité le contat vijins cun porsones che sofrësc de infeziuns ai fiá blanc y al col;
• 3) No te aziché edli, nes y bocia cun les mans;
• 4) Stopete la bocia y nes canche te stranüdlëies o tosses;
• 5) Ne sté a tó medejines antivirales o antibiotiches, ater co sce ares é scrites dal dotur;
• 6) Puzenëia les surasperses cun dejinfetanc che contëgn clor o alcol;
• 7) Adora le mascherot ma sce te sospetëies da ester amaré o fistidiëies por porsones amarades;
• 8) I produc »Made in China« y i poc che vegn dala Cina n’é nia prigorusc;
• 9) I tiers da compagnia ne porta nia inant le coronavirus nü;
• 10) Contatëia le numer 1500 (te Südtirol contatëia por telefon to dotur de ciasa) sce t’as borjú o la tos, o sce t’es gnü dala Cina ti ultims 14 dis.

Deplü t’La Usc di Ladins di 13 de merz










 (pablo)