La Usc di Ladins

La Val Badia á cun la Maratona dles Dolomites, i Bike Days o ince les tapes dla Transalp n pér de manifestaziuns dla roda conesciüdes lunc y lerch. Cun i trus dla roda sunse indere ciamó zoruch de n gröm d’agn, p.ej. respet ala valada de Puster. An pó pensé ales discusciuns animades che an á albü tl comun de Badia, mo bëgn ince a chël toch de tru che an á cina ciamó realisé, mo funzionëia plü mal co bun.
I baiun di 4 km danter Longega y Picolin, ite por bosch de Plaies. I pröms laurs por chësc tru é bele gnüs fac dl 2013; cun i agn á l’Ispetorat Forestal da Bornech y la Comunité Comprensoriala de Puster fat bindebó de operes: taié fora plantes y alüsc deslarié le tru, costruí mürs de peres, n mür de geotex, drenajes dl terac, stües por tigní sö le tru. Lapró án metü sot tera ite i ros por la fira otica, cun chi che an s’á sparagné da scarzé sö la strada basite. Dulcis in fundo é le tru gnü asfalté y ala fin án ciamó fat na bela sí de proteziun. Cosć indöt: incër 1,2 miliuns de euro.
Ti agn él indere feter tres sté stlüt: dl 2017 deache an messâ rové laurs y spo deache al gnô taié lignan, dl 2018 él sté davert, mo spo él gnü "Vaia" y canche an ê por comedé chi danns, él gnü la gran novera. Le tru é sëgn dötaorela stlüt y te condiziuns plü co precares y restará bonamënter stlüt ince iniann.

I un baié cun le responsabl tla Comunité Comprensoriala de Puster, che nes á splighé la situaziun atuala y ci che an á imënt da fá. T’La Usc di Ladins di 10 de messé podëise lí deplü.  (pablo)