La Usc di Ladins

La tematica dl’ajënda 2020/21 é la sconanza dl ambiënt. I dui mandli Blanch y Fosch röia en chësc iade jö söla tera y impara a conësce dantadöt la problematica dla microplastica che röia tres nosc consum tl’ega dl mer y insciö ti tiers y ince indó te nüsc taís. Blanch y Fosch é n pü’ spordüs mo ai ne perd nia la speranza, deache ara vá da fá val' decuntra! Tl’ajënda nöia podëise descurí ci, porchël liedela cun atenziun!
I pici libri da stories é indöt 10 y é ponsá por i mituns y les mitans che impara da lí. La metoda dla despartiziun dles silbes vëgn dër aprijada ciodiche an impara a chësta manira nia da lí les lëtres sores mo bëgn na pert intiera dla parora. Fajun n ejëmpl: por imparé la parora "fana" ne liunse nia plü lëtra por lëtra, "f-a-n-a", mo "fa-na": sides tl baié co tl imparé é le tru a chësta moda plü scëmpl y manco sfadius. Ince le coliamënt danter lí la parora y capí so significat é scemplifiché.

Les ajëndes de scora ciafa i scolars y les scolares dles scores elementares dales direziuns, tratan che i 10 pici libri da stories é da ciafé da cumpré te Istitut Ladin Micurá de Rü al prisc de 25,00 euro.
A düc chi che laora tl monn dla scora ti aodunse de cör n bun mëteman, dantadöt te chësta situaziun ciamó malsigüda dl Covid.  (Uniun Ladins Val Badia)