La Usc di Ladins

Do les previjiuns scöres fosces por l’isté, án ala fin impó albü na sajun valgamia buna, che á indó porté ite positivité. Ince por chësc invern ciarâra fora bun. Les prenotaziuns gnô ite, les condiziuns ê bunes, la orenté da pert di operadus grana. Spo é les infeziuns indó jüdes sö, a livel internazional, tan che stac mët indó man da stlü y ince tl Südtirol sunse indó te n lockdown. Ai 28 êl preodü da daurí i pröms implanc, mo sön la sajun él ciamó n gran punt de domanda. Trica él ince danter i ostis, che á fistidi de plü versc: por les prenotaziuns, por le personal, por investimënc fac y d’ater. I un damané n valgönes minunghes.

Valgügn zitac
L’ostí Simon Tirel dl Hotel Diana da La Ila dij che »Al momënt n’unse por fortüna nia albü tröpes desdites, mo prenotaziuns nöies ne vëgnel nia lapró. La jënt aspeta, al é döt ciamó massa malsigü.« Filippo Clara dl Hotel Mareo d’Al Plan alza fora che »Les prenotaziuns é stades bunes cina dan da n mëis. La jënt prenotâ por döt invern y al ê n bun andamënt. Sëgn che i numeri dles infeziuns vá sö, á döt dé do te n iade. Al n’é plü degönes domandes, scemai damanai da podëi desdí.« Mathias Costa de "L’Murin" a Corvara á cun so Aprés Ski ciamó n’atra realté. An chir ciamó soluziuns, mo al dij bele sëgn che "Dessigü ne sarál en chësc invern nia L’Murin sciöche i le conesciun.«

T’La Usc di Ladins di 6 de novëmber podarëise lí tröpes minunghes y situaziuns da pert de ostis dla valada.  (Intervistes: pablo y kp)