La Usc di Ladins

Al é bele n gröm d’agn che an chir te Mareo na soluziun por la strada de Fodara Vedla y Senes, plü avisa por le prigo da lovines d’invern. Dantadöt l’ultim toch denanche rové sön Fodara alda pro i plü prigorusc. Canche al vëgn de gran nëis, sán bele che al gnará tlafinada ince la lovina. N prigo che podess avëi de burtes conseguënzes, sce an pënsa ai ostis de munt y sües families, ai schialpinisć, a chi dla liösa y ai tröc escurjionisć che vá ite y sö ince tratan la sajun frëida. Un di ejëmpli plü frësć án albü ai 28 de dezëmber dl 2017, canche la lovina "de Col de Rü" á abiné n iat dala nëi y ince porsones, che se l’á dötes por fortüna cavada cun na spordüda. Chësc isté él garaté la soluziun: l’Ispetorat Forestal da Bornech á lascé fá na varianta che é garatada plü lungia y che passa sura le raiun prigorus ca.

T’La Usc dl vëndres ai 13 de novëmber ciafëise na intervista cun le vizediretur dl Ispetorat Forestal da Bornech Gottlieb Moling, che nes dij deplü sön le proiet y sön ci che al nen sará dla strada atuala  (pablo)