La Usc di Ladins

Les proieziuns di comuns y de döt Südtirol publicades da www.stol.it cun grafiches mostra sö cun percentuales tan de porsones che á na infeziun da coronavirus comun por comun te Südtirol. Lapró vëgnel dé dant i caji sön 1000 abitanc te n de y tla spana di ultims 14 dis.
I dac vëgn tuc ca dai numeri ofiziai dl’Aziënda sanitara (SABES) resp. dala Provinzia da Balsan. La firma SiMedia mët a desposiziun le hosting y i cunc por la API y l’elaboraziun dac desco ince le sorvisc dles mapes debann.

Mareo é cöce (plü co 3 caji de infeziun sön 1000 abitanc)
Mareo é da ciafé dant söla litra dles infeziuns nöies te 24 ores y ti ultims chinescdé: i infetá da coronavirus atifs é 70 (le 2,25% dla jënt residënta), i caji sön 1000 abitanc fej fora le 4,82% (indöt 15 al de), i caji ti ultims chinescdé sön 1000 abitanc fej fora bëgn le 24,74% (cun indöt 77 caji registrá).

Incö ai 18-11-2020 él aladó di dac nüs che reverda les infeziuns nöies (tl ultim de sön 1000 abitanc) en relaziun ala popolaziun ma i comuns da Laurein y da Proveis piec co Mareo.

I atri comuns dla Val Badia é vërc (da 0 a 2,5 caji de infeziun sön 1000 abitanc)
San Martin de Tor á incö 3 caji nüs (atualmënter infetá: 29), Corvara 2 (atualmënter infetá: 8), La Val 1 (atualmënter infetá: 17), Badia 1 (atualmënter infetá: 20).

 (Iaco Rigo)