La Usc di Ladins

Cun le 1. de merz á la Uniun Europeica metü dant etichëtes nöies sön les mascins da ciasa, por ti jí incuntra ai consumadus, che se fej insciö plü saurí da confronté i produc y da chirí fora chël che ti büta deplü aladô de sües esigënzes. Les etichëtes nöies sará por le momënt ma sön certi aparac, sciöche en particolar sön mascins da lavé jö, mascins da lavé guant y da assuié la blanciaria, frighi, monitors y televijiuns. Da novëmber gnarál spo metü etichëtes nöies ince sön produc relatifs ala ilominaziuns y spo dal 2022 ince sön climatisadus, furns y scialdabagns.

Plü saurí da confronté
L'obietif de chësta classificaziun nöia é chël da scemplifiché le confrunt danter plü mascins. Da sëgn inant vëgn vigni aparat classifiché cun na lëtra che vá dala A ala G. Les mascins che vëgn classificades cun la lëtra A consumëia dër pücia energia, chëres che toma tla classificuaziun cun la lëtra G consumëia indere deplü.»Cun les etichëtes nöies tomará sëgn gran pert dles mascins te na categoria plü bassa«, dij la direturia dla Zentrala di Consumadus dl Südtirol Gunde Bauhofer. »La classificaziun é sëgn plü zitia y le consum di aparac vëgn calcolé plü avisa aladô de chëra che é l'adoranza efetiva tla vita da vigni de. Insciö á i consumadus la poscibilité da chirí fora y cumpré la mascin che corespogn a sües esigënzes.« Sön vigni etichëta sarál sëgn ince n QR code y tres na aplicaziun sön le smartphone podará i consumadus confronté deplü aparac y chirí fora chël plü adaté aladô de plü criters sciöche p.ej. le consum de strom, de ega, le crabal che l'aparat fej y ii. (fontana: Zentrala di Consumadus dl Südtirol)

I ti ún fat n valgönes domandes al eletrizist da La Ila Andi Frenademez. I podëis lí l'articul intier tla ediziun stampada d'La Usc di Ladins dl vëndres ai 2 de aurí.   (kp)