La Usc di Ladins

La ediziun numer 34 dla Maratona dles Dolomites-Enel, che ess messü gní fata ai 5 de messé dl 2020, é gnüda desdita a gauja dla pandemia. An l'á spostada a iniann y ara dess garaté la domënia ai 4 de messé dl 2021. Mo de sigü ne sán ciamó nia y i dübi é tröc, ince sce gran pert dles manifestaziuns sportives a livel nazional y internazional á podü gní organisades, tl respet dles normatives y cun le control regolar di atlec tres i tesć antigenics.
La Maratona dles Dolomites é na manifestaziun che chërda adalerch te nüsc paisc milesc de ziclisć. Garetera mo en chësc ann? I ti l'ún damané a Michil Costa, che nes á respognü che al momënt laora le comité por oganisé en segurëza la gara, tl respet de dötes les normes y les prescriziuns metüdes dant. Mo la dezijiun finala, sce an podará desfiré o no la gara, ne ti speta nia al comité de organisaziun: "Al é na dezijiun massa importanta che ne se speta nia a nos. Te chësc momënt ne se tratera nia de ester otimisć o pessimisć, an mëss ester realisć", dij Costa che critichëia la dezijiun dla politica de mëteman bele sëgn cun les daurides: "I dac n'é nia ciamó massa bugn, al é massa adora da daurí!", stlüjel jö. 

Deplü sön ci che Michil Costa nes á dit en cunt dla Maratona, podëise lí tla ediziun d'La Usc di Ladins che gnará fora en vëndres ai 23 de aurí.   (kp)