La Usc di Ladins

Al é passé 8 agn dala pröma ediziun de SMACH, proiet artistich, che é chersciü dassënn y che s'á svilupé te chisc agn, se fajon conësce y aprijé a livel nazional y internazional. Insciö él rové ite iniann, por la cuinta ediziun, passa 1.000 propostes da pert de artisć y artistes da döt le monn. La iuria nen n'á chirí fora diesc, che é gnüdes metüdes fora te feter düc i comuns dla Val Badia, nia ma a San Martin, mo ince te Mareo, a La Val y Badia. Tres n percurs de trekking dla dorada de trëi dis, cun 72.5 km y za. 25 ores da jí a pe, vëgnel pité la poscibilité da jí a ti ciaré a dötes les operes, ston suranöt a dormí te üties da munt. Insciö él ince nasciü na colaboraziun danter les Assoziaziuns Turistiches de Plan de Corones y dl' Alta Badia, colaboraziun che vëgn dër aprijada da tramesdöes les perts sciöche al é gnü sotrissé tratan la daurida dal presidënt marou Werner Call y ince da Roberto Huber de Alta Badia Brand. 

Nia ma ert, mo ince musiga y chino
Dal 2013 incá é SMACH chersciü y s'á svilupé tres deplü. Al é gnü metü sö na assoziaziun culturala, che ne se crüzia nia ma plü dla mostra alaleria, mo che mët da jí ince d'atres iniziatives adöm cun d'atri grups y assoziaziuns dl post. Insciö sarál tratan döt l'isté tla Val dl'Ert »Film.Club«, na ligna de proieziuns cinematografiches, che vëgn metüdes da jí adöm cun le grup di Jogn da San Martin. I films vëgn lasciá odëi alaleria, vigni döes edemes, dagnora le vëndres dales 21:00. Le pröm film é sté »Sole«, de Carlo Sironi, ché é gnü proieté ai 9 de messé. Ai 23 de messé saral spo da odëi »Il sale della terra«, film dl 2015 di regisć Wim Wenders y Juliano R. Salgado. Dlungia i films sarál tla Val dl'Ert en chësc isté ince na sëra dedicada ala musiga, organisada en colaboraziun cun »Badiamusica«. La sabeda ai 7 d'agost sonará dales 17:00 inant le sestet »Bozner Brass«. Dötes chëstes manifestaziuns é debann.

Deplü podëise lí tla ediziun stampada da en vëndres ai 16 de messé.   (kp)