La Usc di Ladins

Por le terzo ann él gnü organisé »Nos dales bales«, manifestaziun culinara che tol ite tröc restoranc y hotí de Badia, che ti porta dant ai ghesć bales de vigni sort, particolares y da na buna saú. Insciö vëgnel tenü sön mësa bales sarades o duces, cun erbes da munt, sosses de vigni sort, cajôs, fonguns y pësc. Pro vigni derzada vëgnel ince pité y aconsié n bun gote de vin che passenëia. La pröma ediziun de »Nos dales bales«, stada dl 2019, â podü gní fata tl zënter da San Linert. Chiló êl garaté n evënt alaleria dër aprijé, olache i ghesć – mo ince tröc dl post – podô rodé danter n stont y l'ater y ciarcé les bales cujinades da coghi y conditeri. A gauja dl Covid ne pó chësta sort de manifestaziun nia gní fata, por tigní fora amudlamënc. Impó án orü organisé »Nos dales bales«, te na verjiun desfarënta, che plej ince dër. Les bales pon jí a ciarcé ti hotí, restoranc y conditories, liá tres n percurs che pó gní desfiré a pe, cun la roda o cun l'auto. Sambëgn vëgnel insciö n pü' a mancé l'aspet sozial dla manifestaziun, mo dl'ater vers röia i ghesć pormez y ite tles strotöres, che pó se fá conësce.

Bales sarades...
Sis hotí de Badia á pité bales sarades: le hotel »San Leonardo« á tenü sön mësa bales da orties y cajó cun ragú de finferli, tl hotel »Gran Ander« án podü ciarcé bales da fié te bröt de coda de bó. Le cogo dl »Naturhotel Miraval« á cujiné na buna bala da erbes salvaries, che al á sorví adöm cun n toch de salmerin y n sorbet da fëgn y yogurt. Na derzada sarada é ince gnüda metüda sön mësa dal cogo y patrun dla ponsiun »Rungg«: na bala da pücia sön sossa da erbes aromatiches y flus da munt. Adöm cun la bala da farina de siara, á i ghesć che é storc pro dala »Ostaria Posta«, ince podü se mangé n bun golasc. Le cogo dl hotel "Gardenazza" á cujiné bales tociades cun ciote sfomié y capüc.


… y bales duces
Do les bales sarades, êl spo les bales duces, da mangé sciöche dessert. Tl hotel »Cavallino«, sö San Linert, gnôl pité bales da ciote implides cun crema da gianduia, brodorades spo tles nojeles y destenüdes sön na sossa da pieries. Le conditer de »I dolci di Ricky« á arjigné na bala da ciote cun müies cialdes y dlacin da vanilia. Tl hotel »Melodia del Bosco« án podü ciarcé na bala da ciote cun pom caramelisá, üa passa y ciuchelada, n crocant da anis y faü (holunder, ndr). Cun le bel tëmp che ê en chël de, nen n'á tröc – sides sciori co jënt dl post - aprofité da jí a se mangé n bun tai de bales. Tres na spazirada, o ince cun l'auto, podôn jí da na ostaria al'atra y danter n tai y n gote de vin se gode la bela musiga dal ví cun le grup »Pippi's Friends« y Mattia Demetz. A chi che orô spo imparé da cujiné, ti él spo gnü pité la poscibilité da jí sö Murin, olache la patrona Helga á dé consëis sön co adoré y cujiné les erbes aromatiches, por ti dé ciamó na miú saú ales bales. (kp)  (kp)