La Usc di Ladins

Ai 8 d’agost pëia ia ofizialmënter l’ativité dl grup "First Responder" a Lungiarü. Ara se trata de n grup de pröm aiüt, che vëgn metü sö te chi posć olache an mëss aspeté almanco 20 menüc cina che l’ambulanza sciafia da rové alerch. A Lungiarü án n te’ caje, tignon cunt che la seziun plü davijin é chëra d’Al Plan. Le grup "First Responder" da Lungiarü é le 15ejim dla provinzia y le pröm tla Ladinia. Al é metü adöm da 26 volontares y volontars dla Crusc Blancia y di södafüch, che pîta sorvisc 24 ores sön 24.
Chisc á stlüt jö cun suzes na formaziun aposta y é insciö arjigná por intervënc de vigni sort: da medié taiades cina a problems de zircolaziun, da inzidënc plü pesoc a reanimaziuns. Sambëgn á i socoridus ince l’atrezadöra aladô, sciöche n defibriladú semiautomatich (AED). Le grup é sot la direziun de Fabian Moling y vëgn alarmé por caji de debojëgn che toma ite tl raiun d’intervënt di Stödafüch da Lungiarü. I mesi de trasport vëgn metüs a desposiziun dai stödafüch instësc. Le grup toca pro la seziun dla Crusc Blancia de Mareo.