La Usc di Ladins

Sciöche i un bele scrit tla ediziun dl 1. d’otober, é avisa en chël de jü en ponsiun te Mareo le dotur de ciasa Aldo Marcocci, che á fat sorvisc 38 agn alalungia, deboriada cun süa fomena Annalisa Mocellin che l’á dagnora acompagné y sostigní tl laur cun les porsones. N sorvisc che ai á fat dlungia la jënt, y che é gnü aprijé dala jënt. Chësc tëmp tan lunch n’orônse nia lascé passé ia zënza s’la cunté n iade plü a funz cun le dotur Marcocci, sön co che le laur da dotur s’á mudé, sön co che al é pordërt rové te Mareo, sön les situaziuns che ti á lascé na merscia y sön co che al á vit para le tëmp dla pandemia dl Covid.
Le dotur Aldo Marcocci é nasciü ai 5 d’aurí dl 1954 a Porsenú. Sü geniturs ê Lidia y Manlio Marcocci, süa lâ da pert dla uma ê cinamai de Mareo: Iule Ellecosta de Bastl. Aldo Marcocci á fat les scores d’oblianza a Porsenú, por jí spo a studié tl Lizeum Scien­ tifich a Balsan. Do la matura ál tut la dezijiun da jí a studié medejina. Dui agn ál studié tla Université de Bologna, por jí inant 4 agn tla Université de Padova, do che al â imparé da conësce la jona Annalisa da Valstagna tla Valsugana, che deventará spo süa fomena. A Padova á Aldo Marcocci ince fat la speziali­saziun de medejina interna, che ti ess dé la poscibilité da lauré te spitol, sce al ess orü. Do i stüdi él ciamó sté 6 mëisc a Padova pro so professur, por rové spo dl 1981 a lauré tl spitol da Porsenú, olache al á fat sorvisc n ann y 10 mëisc.
Alê le 1. de forá dl 1983 che le dotur Marcocci é rové dotur de ciasa a Al Plan, cun l’eté de 28 agn. En chël ann s’ál ince maridé cun Annalisa, che é gnüda a sté te Mareo cun i pröms de messé. Annalisa dij che ara s’á atira sintí da ciasa, deache tl ladin êl valgünes parores che ti sonâ familiares. Ares ti recordâ parores dl dialet venet che so nene adorâ dandaia – vistla, coltrines, schirata y d’atres. Co che ara ti é jüda a Aldo, unse albü l’ocajiun da ti damané pro na ciacolada tla ciasa nöia che ai s’á fat sö dan da püch dlungia le zënter d’Al Plan.

La intervista ciafëise t’La Usc di Ladins di 22 d’otober











 (Intervista: Pablo Palfrader)